自由，是為著甚麼？獨立紀念日與基督的軛 (羅馬書7:15-25a、馬太福音 11:16-19, 25-30) (July 5, 2026 )
Date: July 5, 2026 (Sixth Sunday after Pentecost)
Location: TPC of Greater Chicago
Sermon title: 自由，是為著甚麼？獨立紀念日與基督的軛
Scriptures: 羅馬書7:15-25a、馬太福音 11:16-19, 25-30
0-問安
各位主內ê兄弟姊妹，大家平安！
昨暝是七月四日，美國ê獨立紀念日。佇芝加哥及全美國各所在，咱看著美國的國旗、煙火、遊行、音樂會及家庭聚會。對真多人來講，這是一個歡喜記念自由ê日子；對真多移民家庭來講，這也是一個感謝ê日子，感謝來到這個國家了後，所得著ê新機會、新生活及相對安全ê環境。
全美台灣同鄉會，也在這個禮拜在芝加哥舉辨三區的聯合夏令營。我們中間有很多兄姊都有參與，其中，我們的蔡昇峰長老今天還負責了夏令營的祈禱與禮拜。咱們的教會實在是非常投入於台美人的社團，也非常關心台灣的前途與發展，包括了在前幾天，在咱教會舉辨的FAPA講座，來關心台灣和美國的軍事合作和安全。
所以，我認為，也要邀請在座的以及網路線上的兄姊，一起來思考：七月四日過後ê今日，咱做基督徒ê，特別是台灣人、台灣美國人，又是長老宗ê信徒，咱需要閣問一個比煙火、國旗及慶典更加深ê問題：
自由，是為著甚麼？
獨立紀念日通常提醒人問：「美國是對甚麼權勢得著獨立？」但是信仰閣進一步問：「得著獨立了後，咱欲成做甚麼款ê人？欲建立甚麼款ê社會？上帝賞賜自由，是只欲互咱保護自己ê權利，抑是也欲互咱有能力疼鄰舍、承擔責任、追求公義？」
換一句話講，自由毋只是「脫離甚麼」；自由也是「進入甚麼」。自由毋只是拒絕受人支配，也是學習按怎毋去支配別人；毋只是爭取家己ê聲音，也是學習聽見別人ê聲音。
1. 開始的禱告
咱一起來禱告：
耶和華我ê石磐，救贖我ê主
ah；
願我ê嘴所講ê，心所想ê，tī你ê面前得tio̍h接納。阿們。（詩 19:14）
2. 獨立紀念日：感謝自由，也面對未完成ê應許
七月四日對美國長老宗有特別ê意義。歷史上，長老宗信徒曾經參與美國獨立運動、革命，以及憲政制度ê形成。[1]長老宗ê治理制度強調代表制度、議會、共同辨識及權力ê制衡。教會無將所有ê權力集中佇一位牧師、一位主教，抑是一個領袖ê身上；長老、牧師及信徒需要共同參與，互相負責，也互相監督與扶持。
這款教會治理ê精神，也影響美國人對代表制度及公共責任ê想像。七月四日對長老宗毋只是記念一個國家ê生日；它也提醒咱，人民ê權利真重要，統治者ê權力毋是無限制，政府應該為著眾人ê福祉、公義及平等來服務。[2]
毋過，長老宗ê信仰從來無教示咱將國家當作上帝。改革宗傳統所強調ê，是上帝ê主權超越一切。任何國家、政府、政黨、法院、軍隊，甚至教會本身，攏是人ê制度；人ê制度攏有限制，攏可能犯罪，也攏需要不斷改革。
所以，長老宗信徒慶祝國家ê方式，毋是講：「咱ê國家永遠正確。」相反，是講：「因為咱疼這個國家，所以咱願意誠實看見它ê光榮，也看見它ê傷痕；感謝它已經成就ê自由，也繼續追求它尚未完成ê應許。」[3]
美國《獨立宣言》(Declaration
of Independence) 宣稱人受造平等，但是這個國家ê歷史，也包括原住民族ê土地受剝奪、黑奴制度、種族隔離、婦女長期無投票權，以及移民、亞洲人及其他少數群體所受ê排斥。
甚至佇宣告自由ê時，真多人猶原無自由；佇宣告人人平等ê時，真多人猶原無被當做人。
講出這些歷史，毋是欲否定美國ê自由，也毋是欲互人只有罪惡感。反轉，這是欲提醒咱：自由永遠需要不斷實踐；一個國家有一份偉大ê獨立宣言，並不表示所有人已經真正得著自由。[4]
真正ê愛國，毋是盲目服從，是有勇氣講實話；真正ê忠誠，毋是掩蓋傷痕，是願意參與醫治、復合的過程；真正ê自由，也毋是「我欲按怎就按怎」，反而是「我有能力用疼來服事別人」。
這就是為甚麼基督徒佇七月四日，除了唱歌、感謝、慶祝，也需要禱告、反省及悔改。因為咱毋只是問：「我有甚麼權利？」咱也愛問：「我對鄰舍有甚麼責任？」
3. 對台灣人來講，「獨立日」是一個複雜ê問題
對咱台灣人及台美人來講，「獨立紀念日」這個詞更加複雜。
有人或許會問：台灣ê獨立紀念日是甚麼時？是十月十日嗎？[5]
在台灣，十月十日有「國旗」、總統有演說、音樂會、典禮及煙火，表面看起來真親像美國七月四日。但是「雙十節」原本所記念ê革命發生佇中國，毋是台灣人民脫離外來統治、建立自己國家ê日子。對戒嚴時代ê台灣人來講，這些「國家的名稱」也曾經與單一政黨的高壓統治、政治壓迫、語言限制及恐驚連結做伙。
有真多台灣人ê家庭，過去對政治ê記憶不是公開ê故事，而是沉默。包括我的阿公在內，有長輩會講：「政治，這個毋通講。」父母或許會提醒囝兒：「出去外口毋通亂講話。」有時，恐驚甚至無需要有人說明，就一代傳一代，成做身體ê記憶。
但是台灣ê歷史也一直咧變化。咱台灣人民經過長期ê民主化運動、社會運動及在地本 土文化的努力，重新塑造對國家、自由及身份ê理解。
今年也是咱台灣人民直接選舉總統三十週年。1996年，台灣人民第一次用自己ê選票，直接決定誰欲做國家ê總統。總統直選所代表ê重要精神，就是「主權在民」：人民是國家ê主人，領導者ê權力是對人民來，毋是對一個外來政權、一個政黨、一個家族，抑是對一個整世人都是統治者來的。[6]
對台灣來說，這份自由毋是從天頂落落來，也毋是統治者歡喜賞賜人民ê恩惠。它經過二二八、白色恐怖、三十八冬的戒嚴時期，經過真多人受監禁、受監視、失去工作、家庭破碎，甚至失去性命，才一步一步爭取得來。
所以，民主毋只是一種制度；民主也是一份記憶、一份代價，以及一份對後代ê託付(thok-hù)。
所以，對台灣人來講，自由毋是一個抽象ê政治口號。它是咱ê家庭記憶，是長輩過去不敢講出口ê故事，是海外台灣人長期ê關心，也是新一代對民主、人權、身份及未來ê盼望。
毋過，今日ê聖經也提醒咱：有民主制度，並不表示咱就完全自由；有自己ê政府，也不表示罪、恐驚、仇恨及支配人ê慾望已經消失。
民主需要法律及制度，也需要人民內在ê成熟。國家需要安全，也需要良心。自由需要勇氣，也需要謙卑。
4. 保羅ê哀歌：咱明知影自由，卻無一定活得出自由
保羅佇羅馬書第七章講：
「因為我所意愛ê好，我無去行；我所m̄-ài
ê pháiⁿ，反tńg去行。」(7:19)
有時咱將這段經文理解做一個個人ê道德困境：我知影甚麼是好，卻做袂到；我知影應該原諒，卻猶原怨恨；我知影應該休息，卻無法度停落來；我知影應該信靠上帝，卻一直被恐驚拖牢。
這當然是這段經文ê一部分。但是這段經文也真親像舊約ê哀歌。[7]
哀歌通常有一個基本ê過程：上帝曾經有應許；人卻經驗痛苦；痛苦互人發出呼求；上帝帶來拯救；人就轉向上帝來大聲讚美。
保羅佇遮也用仝款ê語言。上帝ê律法本來應允人得到生命，但是罪利用律法，互人經驗受定罪、衝突及死亡。保羅ê「我」親像一個被對敵包圍ê人；只是這個敵人毋只是外在ê軍隊，而是住佇人內面ê罪。
罪佇羅馬書中毋只是做錯一件代誌。罪是一種權勢。它會欺騙人、俘虜(hu-ló)人，也會進入人ê思想、習慣、文化、制度及國家ê生活。
所以，羅馬書中ê「我」，毋一定只有保羅一個人。這個「我」也可能是每一個人、每一間教會、每一個民族及每一個國家ê聲音。
比如說。
美國可以宣稱人人平等，卻長期無將平等實現佇逐個人身上。
台灣可以珍惜民主，卻也可能將政治立場無仝ê人看做對敵；可以反對外來支配，卻佇家庭、職場、教會及社會中，繼續使用權威控制別人。
咱講愛台灣，卻可能無願意聽原住民族ê聲；無看見新住民、移工及弱勢家庭ê處境；無接納性別、世代及身份無仝ê人。
咱講自由，卻可能只想保護自己ê言論，無願意聽別人講話。
咱講民主，卻可能只有佇自己支持ê人當選時，才尊重選舉結果；當結果無合咱ê意時，就開始認為對方無資格做人民。
教會也可能有仝款ê矛盾。咱講上帝疼逐個人，卻可能因為語言、世代、文化及權力ê差異，互某些人感覺家己永遠是外人。咱講聖神帶領教會更新，卻又可能驚每一項改變；咱講欲吸引下一代，卻只願意下一代照咱ê方式參與。
這就是保羅所講ê矛盾：
咱知影甚麼是好，卻無完全活出來；
咱有自由ê理想，卻可能閣受恐驚支配；
咱反對別人壓迫咱，卻可能無注意到咱也咧壓迫別人。
有時罪甚至會利用好ê事物。法律本來是好ê，罪卻會利用法律來定罪、排斥及控制人。民族認同本來會互受壓迫ê人民重新得著尊嚴，罪卻也會將認同變做優越感、排外及仇恨。
甚至信仰本身，若無謙卑及憐憫，也可能變做重軛。宗教本來欲帶人親近上帝，卻可能變做互人一直感覺無夠好、無夠聖潔、無夠忠心。
所以保羅最後無問：「我閣愛較努力偌濟？」伊發出一個哀傷ê呼喊：
「苦ah，我ê做人！是誰
beh救我脫出chit ê致到死ê體ah？」(7:24)
注意看，伊問ê是「誰欲beh救我」，毋是「甚麼制度會完全救我」。
民主真重要，法律真重要，選舉真重要，國家安全也真重要；但是無一個制度能夠單獨醫治人心ê恐驚、貪婪、仇恨及控制的欲望。
自由需要制度ê保障，也需要生命ê更新；需要外在ê法律，也需要內在ê恩典。
5. 「這個世代」：不願意悔改，也不願意接受恩典
馬太福音中，耶穌形容「這個世代」親像市場裡ê囡仔。𪜶互相喝講：
「阮tùi lín pûn笛(ta)á，lín無跳舞；阮bat悲哀，lín無搥胸。」(11:17)
施洗約翰來，無食無啉，要求人悔改；人講伊有鬼。
耶穌來，與稅吏、罪人及受排斥ê人坐佇仝一張桌食飯；人又講伊貪食好酒，是罪人ê朋友。
約翰太過嚴格，耶穌又太過寬鬆；一個太悲觀，一個太歡喜。無論上帝的心意用甚麼方式臨到，𪜶攏有理由拒絕。
問題毋是上帝ê信息無夠清楚；問題是𪜶要求上帝照自己ê劇本演出。𪜶欲控制音樂，也欲控制別人按怎跳舞。
這段經文也真適合今日ê民主社會。因為民主本來應該是共同生活、互相聽見及共同承擔；但是有時咱將民主變做：「逐個人攏愛照我的音樂跳舞。」
咱一方面要求教會回應時代，一方面又要求教會毋通改變咱熟似ê方式。
這正是「吹笛無跳舞，唱哀歌無悲傷」ê景況。
國家慶祝ê時，咱要求教會替國家祝福，卻無願意教會指出國家ê罪。
咱愛聽自由、民主、人權及台灣主體性；但是當講道要求咱檢查家己ê偏見、特權及排斥，咱可能又感覺所傳講的內容不好聽。
咱講愛台灣，但是當教會問：「咱所愛ê台灣，欲按怎對待上細漢、上無權勢ê人？」咱可能毋願意回答。
咱講愛美國，但是當教會問：「這個國家ê自由，有無真正臨到黑人、原住民、移民、窮人及性別少數？」咱可能欲轉移話題。
耶穌最後講：「但是智慧tùi伊ê所行顯明伊是tio̍h。」(11:19)
真正ê智慧毋是用口號來證明，是用所結ê果子來證明。耶穌ê身份毋只是靠伊講甚麼，而是看伊所做ê：失明ê人看見、跛腳ê人行路、受排斥ê人重新進入群體、窮人聽見好消息。
所以，一個國家ê自由，也愛看它所結ê果子。
一個國家ê自由，有無保護弱勢？
一個民主ê制度，有無保障少數人？
一間教會ê信仰，有無互疲倦ê人得著安歇？
一個民族ê獨立，有無使咱更加尊重其他民族ê尊嚴？
「智慧tùi伊ê所行顯明伊是tio̍h。」也是講：自由需要化做行動。若自由只停佇口號、旗幟及煙火，卻無進入家庭、教會、學校及公共生活，它就猶原是一個未完成ê應許。
6. 上帝將智慧顯明予嬰孩
馬太福音接落來，耶穌感謝天父，因為上帝將這些事向「聰明通達ê人」隱藏，卻向「細子」顯明。(11:25)
耶穌毋是反對知識，也毋是講人毋免受教育。這裡所批判ê，是一種自以為完全了解、自以為有資格控制上帝ê態度。
「聰明通達ê人」可能認為上帝一定愛照𪜶ê神學、政治及文化期待來行；「細子」卻知影家己需要領受、需要學習、需要倚靠。
這對獨立紀念日也真重要。因為國家有時會將自己想做完全成熟、完全正義、毋需要悔改ê大人。但是耶穌講，上帝ê國是顯明予願意親像囡仔領受ê人。
真正ê民主韌性，也需要這款謙卑。一个國家若認為家己永遠無錯，就無法度改革；一個政黨若認為只有家己代表人民，就會走向威權；一間教會若認為過去所有ê方式攏不可改，就可能無法度聽見聖神新ê帶領。[8]
自由需要勇敢，但是自由也需要受教ê心。
7. 耶穌無講「無軛」，是邀請咱換一副軛
耶穌對勞苦、背重擔ê人講：
「Lín見若tio̍h磨擔(taⁿ)重擔(tàⁿ)ê，tio̍h就近我；我beh
hō͘ lín安歇。我心內溫柔謙遜；lín背我ê taⁿ，來tùi我學，就lín ê心神會得tio̍h安歇。因為我ê taⁿ是快，我ê擔是輕。」(11:28-30)
這句話真值得注意。耶穌無講：「來就近我，我欲將所有ê軛攏除去。」伊講：「背我的軛。」
換一句話講，基督徒ê自由毋是無任何約束、無任何關係、無任何責任。真正ê問題毋是咱有軛抑是無軛；真正ê問題是：
咱咧背誰ê軛？
咱可能背國家主義ê軛，認為自己ê國家永遠正確。
咱可能背帝國ê軛，認為強大ê國家有權替弱小ê人民決定未來。
咱可能背政黨ê軛，將忠於政黨看做高過忠於真理。
咱可能背恐驚ê軛，日日擔心台灣ê安全、美國ê未來、教會ê存續及下一代ê信仰，以致咱無法度安歇。
咱也可能背成功及別人期待ê軛，認為只有得到國際ê承認、社會ê肯定、囝兒ê成就，抑是教會人數ê增加，才證明咱有價值。
對移民家庭來講，這個軛有時是：「咱已經犧牲遮濟，囝兒一定愛成功。」對教會來講，這個軛可能是：「咱一定愛保留過去每一項方式，若無，就是背叛長輩與傳統。」也可能是另外一個極端：「咱一定愛完全變做新ê，傳統攏無價值。」
耶穌無邀請咱用一個重軛換另外一個重軛。伊邀請咱背伊ê軛。
基督ê軛是溫柔、謙卑、真理、憐憫及彼此服事ê軛。
「溫柔」毋是無立場，也毋是軟弱。耶穌ê溫柔，是有能力卻無用能力羞辱人；是勇敢面對不公義，卻無將對方看做無人性；是堅持真理，卻知影家己也需要悔改。
「謙卑」也毋是否定家己ê價值。謙卑是承認只有上帝是主，任何國家、政黨、總統、牧師及教會攏不是救世主。
所以，長老宗ê信仰使咱有自由疼一個國家，也有自由批判它；有自由為台灣ê主權及尊嚴發聲，也有自由檢查台灣社會內部ê不公義。
基督ê軛是輕省ê，毋是因為跟隨耶穌無代價。追求自由、公義、民主及和平一直有代價。基督ê軛是輕省ê，因為咱毋免孤單承擔，也毋免假裝家己是世界ê救主。
所謂「安歇」，也毋是逃避世界。耶穌ê安歇，是互咱毋免靠驚惶、仇恨及自我證明來服事；是在尚未完全ê世界中，猶原知影上帝與咱同在。
8. 從獨立進入彼此倚靠
神學家提我們一個重要的信仰反省：基督徒慶祝ê毋應該只有
independence，獨立；也應該包括
interdependence，彼此倚靠。[9]
獨立講：「別人無權支配我。」
彼此倚靠講：「我的生命與別人ê生命連結做伙。」
獨立保護人ê尊嚴；彼此倚靠提醒咱承擔責任。
真正ê彼此倚靠，毋是強者要求弱者順服。對台灣來講，彼此倚靠絕對毋是接受中國ê支配，也毋是否定台灣人民自我決定ê權利。若一段關係無自由、無平等、無尊重，只有威脅及強迫，彼個毋是彼此倚靠，是支配。
真正ê彼此倚靠，是自由ê人與自由ê人，佇平等、尊重及負責任中間建立關係。
對美國來講，彼此倚靠提醒咱，一個國家ê安全無法度單靠軍事及邊界；它也需要鄰舍之間ê信任、健全ê教育、醫療、社會安全網、環境保護，以及對歷史傷害ê修復。
近來有歐洲民調指出，真多歐洲人已經無閣將美國看做可靠ê盟友，每十個人只有一個人認為美國是可靠的國家。[10]過去美國常常講自己是自由世界ê領袖，是民主、人權及國際秩序ê保護者；但是今日，連許多傳統盟友也開始懷疑：若危機臨到，美國會真正站佇𪜶身邊嗎？
這對七月四日是一個真深ê提醒。獨立紀念日毋是只有回想美國曾經對英國ê統治宣告自由，咱也愛問：今日美國有無活出它所宣告ê自由、公義及可受人信任？一個國家若欲做自由ê見證，毋但愛保護自己ê利益，也愛成做值得信任ê鄰舍。若盟友感覺美國愈來愈不可靠，這毋只是外交政策ê問題，也是屬靈ê問題。因為羅馬書提醒咱，人以及國家攏可能知道善與好的代誌，卻做袂出來；講自由，卻活出恐驚；講民主，卻活出支配；講盟友，卻互人感覺孤單。耶穌無邀請咱背國家驕傲ê軛，伊邀請咱背基督ê軛：溫柔、謙卑、誠實、負責任，成做別人真正會當信靠ê鄰舍。
對教會來講，彼此倚靠提醒咱：信仰毋是「我家己信就好」。年長ê人與少年人、台語ê會眾與英語ê世代、早期移民與新移民，需要學習互相聽見、互相扶持。
年長ê一代有記憶、有信仰、有犧牲ê故事；年輕ê一代有新ê語言、新ê問題及新ê世界。教會若只有一方面要求另外一方面照自己ê音樂跳舞，就會變做耶穌所講市場裡ê囡仔。
但是若咱願意背基督ê軛，就會開始問：
我欲按怎理解對方？
我欲按怎分享權力？
我欲按怎互下一代毋只是從外面，來坐佇教會內，而是真正成做教會ê一部分？
我欲按怎珍惜傳統，又無將傳統變做重擔？
咱這間佇芝加哥ê台灣人教會，生活佇兩個國家、兩種歷史及多種文化之間。這毋一定是咱ê負擔；它也可能是上帝賞賜咱ê使命。
咱會當對美國社會作見證：自由不是一次完成ê宣言，是每一代人繼續追求公義ê責任。
咱也會當對台灣作見證：獨立的主權真正重要，但是一個國家ê靈魂，要看它按怎對待上細漢、上無權勢及與多數人無仝ê人。
咱教會也要作好的見證：自由毋是脫離所有關係，是佇基督內得著能力，建立無支配、互相尊重、彼此扶持ê關係。
佇今年Milwaukee,
WI召開的 美國長老教會的通常年會中
(General Assembly, PCUSA)，咱也看見長老宗信仰佇今日繼續問：「自由，是為著甚麼？」總會一方面支持性別肯認醫療
(Gender-affirming surgery)，推動教會佇牧職呼召ê過程中更加誠實面對LGBTQIA+牧者及候選人ê尊嚴、呼召與歸屬，也展開關於性、性別、家庭、關係及歸屬ê神學研究。這提醒咱，自由若是真ê，就毋通只有保護多數人ê身體、多數人ê家庭、多數人ê安全；自由也愛具體保護受傷ê身體、受懷疑ê呼召，以及長久佇教會中被要求隱藏自己ê人。[11]
同時，美國長老教會的通常年會也宣告白人基督教民族主義是「神學錯誤」
(White Christian nationalism “Theological Error”)，因為任何將基督信仰與國家權力、種族優越、白人性(Whiteness)或單一國家敘事綁做伙ê意識形態，攏會扭曲福音。[12]
閣再來，美國長老教會的通常年會決定下一屆總會欲佇波多黎各(Puerto
Rico)舉行，而且要求正式參與者學習波多黎各與美國之間ê歷史、政治及文化關係。[13]這個決定本身就是一個見證：教會若講彼此倚靠，就毋通永遠將中心放佇美國本土、英語世界、白人多數、或咱熟似ê地理與文化範圍內。教會需要移動中心，需要學習受教，需要承認咱對別人ê歷史無一定了解，甚至咱ê想像有時會受媒體、偏見及帝國敘事塑造。
這對佇芝加哥ê台灣人教會也真有意思。咱本身就是離開故鄉、生活佇多重文化中ê移民信仰群體；咱知影被誤解、被忽略、被要求解釋自己是甚麼人ê滋味。也正因為按呢，咱更加受召去聽見其他被邊緣化ê群體，學習與波多黎各、原住民族、黑人教會、移民社群及LGBTQIA+兄弟姊妹站做伙。
這三項咱美國長老教會總會ê見證，攏互咱看見：長老宗ê自由毋是只有慶祝過去，也毋是只有反對外在壓迫；長老宗ê自由是願意佇今日繼續被福音改革。它問咱：咱ê敬拜有無單單以上帝為主？咱ê教會有無真正成做疲倦、受傷及被排斥ê人會得著安歇ê所在？咱ê民主與主權關懷，有無帶咱進入更加闊ê公義與彼此倚靠？耶穌講：「但是智慧tùi伊ê所行顯明伊是tio̍h。」(11:19) 若按呢，今日教會ê智慧，就毋是用口號證明，而是用行動證明：保護受傷ê身體，拒絕偶像化國家，離開中心去聆聽邊緣，並且背起基督溫柔謙卑ê軛，佇自由中彼此服事。
9. 自由，是為著甚麼？
所以，兄弟姊妹，今日咱閣再問：
自由，是為著甚麼？
真正ê民主韌性，毋只是武器、法律及選舉制度ê韌性，也是人民願意聽真話、保護少數、接受監督、承認錯誤及拒絕仇恨ê韌性。
真正ê屬靈韌性，也毋是假裝咱無軟弱。是親像保羅仝款，誠實承認：
「因為我所意愛ê好，我無去行；我所m̄-ài
ê pháiⁿ，反tńg去行。」(7:19)
然後勇敢呼求：
「苦ah，我ê做人！是誰
beh救我脫出chit ê致到死ê體ah？」(7:24)
保羅隨時回答：
「感謝上帝是對咱ê主耶穌基督。」(7:25)
耶穌也對咱講：
「若tio̍h磨擔(taⁿ)重擔(tàⁿ)ê，tio̍h就近我」(11:28)
兄弟姊妹，昨日獨立紀念日ê煙火已經熄去。但是上帝ê問題猶原留佇咱心內：
恁所得著ê自由，是為著甚麼？
咱毋免靠國家ê強大來證明咱ê價值；咱也毋免靠自己ê成功來證明咱值得受疼。咱ê價值來自上帝ê恩典，咱ê自由來自基督ê拯救。
來背基督ê軛，對伊學習溫柔與謙卑。
真正ê自由，毋是無人會當管我；真正ê自由，是罪及恐驚無法度閣支配我。
真正ê獨立，毋是孤單及隔離；真正ê獨立，是無受人支配，並且有能力進入公義、平等及彼此倚靠ê關係。
求上帝釋放咱，是為著互咱自由去疼、自由去服事、自由講真話、自由承認錯誤，也自由為公義及和平共同承擔。
因為耶穌這樣向他的學生說：
「我心內溫柔謙遜；lín背我ê taⁿ，來tùi我學，就lín ê心神會得tio̍h安歇。」(11:29)
阿們。
[1] https://clearlyreformed.org/the-presbyterian-signers-of-the-declaration-of-independence/
[2] https://pcusa.org/news-storytelling/news/2023/7/4/why-fourth-july-matters-presbyterians
[3] https://pcusa.org/news-storytelling/news/2023/6/26/fourth-july-vision
[4] https://justiceunbound.org/reimagining-the-fourth-of-july-a-faithful-celebration-of-freedom-and-responsibility/
[5] https://www.taiwaneseamerican.org/2019/10/no-double-ten-is-not-taiwans-independence-day/
[6] https://www.president.gov.tw/News/39886
[7] Channing
Crisler, An Intertextual Commentary on Romans, Volume 2: Romans 5:1—8:39.
Wipf and Stock Publishers, Kindle edition.
[8] Cynthia
A. Jarvis and E. Elizabeth Johnson, eds., Feasting on the Gospels—Matthew,
Volume 1: A Feasting on the Word Commentary. Presbyterian Publishing
Corporation, Kindle edition. Commentary perspectives by Bonnie L. Pattison,
David L. Bartlett, Lewis R. Donelson, and Dave Bland.
[9] https://justiceunbound.org/reimagining-the-fourth-of-july-a-faithful-celebration-of-freedom-and-responsibility/
[10] https://www.theguardian.com/world/2026/jun/10/only-one-in-10-europeans-now-see-us-as-an-ally-survey-suggests
[11]
Assembly advances several gender and sexuality initiatives
https://pres-outlook.org/2026/06/assembly-approves-three-gender-and-sexuality-committee-recommendations-after-lengthy-debate/
[12]
PC(USA) labels White Christian nationalism “Theological Error”
https://pres-outlook.org/2026/07/pcusa-labels-white-christian-nationalism-theological-error/
[13]
PC(USA) General Assembly votes to hold its next assembly in Puerto Rico
https://pres-outlook.org/2026/07/pcusa-general-assembly-votes-to-hold-its-next-assembly-in-puerto-rico/
Comments